ඔබට තරහා පාලනය කර ගන්න බැරිද? එසේනම් ඔබේ දත් බුරුසුව අනතුරේය.

අපි හැමෝටම තරහ යනවා සමහර වෙලාවට නේද? ඒ තරහ පාලනය කරගන්න බැරුව සමහරු කොයි තරම් නම් කෑ ගහනවද? බඩු පොළවෙ ගහනවද? ඔබට තරහ පාලනය කර ගැනීමට අවශ්‍යද? එහෙනම් මේ කතාව කියවලා ඉන්න.

ඔන්න එක පවුලක නෝනයි මහත්තයයි ඉන්නවා. මේ නෝනට හැම තිස්සෙම පුදුම විදිහට තරහ යන්නෙ එයාගෙ මහත්තයත් එක්ක. බඩු පොළවෙ ගහනවා කොණ්ඩෙන් ඇදගන්නවා කෑ ගහල බනිනවා එක විකාරයයි එයාට තරහ ගියාම.

ඒත් මහත්තයා ඒකෙ අනිත් පැත්ත. කොයි තරම් නෝනට තරහ ගියත් මහත්තයා නෙමෙයි වචනයක්වත් කියන්නෙ. නෝනා අහස පොළොව නුහූලන විදිහට බැන්නත් මහත්තයා ශාන්ත දාන්තව ඉතාම සැනසීමෙන් ඔහේ අහගෙන ඉන්නවා. කිසිම වේදනාවක දුකක කළකිරීමක පාටක් වත් මූණෙන් පේන්න නෑ.

ටික කාලයක් ගියාට පස්සෙ නෝනටත් හරි දුකයි. මොකද එයා කොයි තරම් තරහින් බැන්නත් මහත්තයා පොඩ්ඩක් වත් තරහ ගන්නෙ නැති නිසා. එයා කොහොමද ඒ තරම් තරහ පාලනය කරගෙන ඉන්නෙ. දැන් මේක නෝනට හරි ප්‍රශ්නෙ. බැරිම තැන නෝනා මේක මහත්තයගෙන් ඇහුවා.

නෝනා : "කොහොමද අනේ ඔයා මම මෙච්චර තරහ ගත්තත් පොඩ්ඩක් වත් තරහ නොගෙන ඉන්නෙ? ඔයා ඔයාගෙ තරහ පාලනය කර ගන්නවද? නැත්තං ඔයාට තරහ යන්නෙ නැද්ද?"

මහත්තයා: "අපෝ පිස්සුද? ඔයා මට බනිද්දි මට ඔයාව මරාගෙන කන්න තරම් තරහක් එනවා."

නෝනා: "ඉතිං ඔයා ඒ තරහ නිවා ගන්නෙ කොහොමද?"

මහත්තයා: "අපෝ පොඩි දෙයයි. ඔයා මට බැන්න වෙලාවට ඒ තරහින් මම බාත් රූම් එකට ගිහින් ඔයා දත් මදින දත් බුරුසුව අරගෙන ඒකෙන් ටොයිලට් එක මදිනවා. එතකොට මගෙ තරහ නිකම්ම නැති වෙලා යනවා. ඊළඟ දවසෙ ඔයා ආයෙත් ඒකෙන්ම දත් මදිනවා දැක්කම මට පුදුම සැනසීමක් දැනෙනවා."

ඔයාලා තාම තරහ පාලනය කරගන්න බැරුව අනුන්ට බනිනවද? එහෙනම් පරිස්සමින් හොඳේ දත් බුරුසු පාවිච්චි කරන්නේ.