මේකප් යථාර්ථය

කැම්පස් වලදි නම් බැච් එකේ උපන්දිනේට, ෆ්‍රෙෂර්ස් නයිට් වලට, කලා උළෙලවල්, ස්පොර්ට්ස් ඩේ අවසානයේ DJ නයිට් එකක් තියෙන එක සාමාන්‍ය දෙයක්නෙ. අපේ උන් නම් ට්‍රිප් එකක් ගිහින් ඇවිත් ඉතුරු වෙච්ච සල්ලි වලිනුත් DJ තියලා තියෙනවා.

ඔන්න එක පාරක් අපේ ඉවෙන්ට් එකක් අවසානයේ DJ එකක් තිබ්බා.

කෙල්ලෙක් ඉතින් ඔය වගේ දවසක් එනකල් ඉන්නවනෙ තමන්ගෙ උපරිම දක්ෂතාවය දාලා ලස්සන වෙන්න. කෙල්ලො නිකන් එදාට මිහිබට සුරංගනාවියන් වගේ. හික්ස්. මේකප් ප්‍රාතිහාර්යය තමා ඉතින් වෙන මොනවද.

එක බැච් එකේ ඉන්න උන්ටත් අඳුරගන්න බැරි වෙන තරමට සමහරු මේකප් දාගෙන එනවා.

අපේ නිෂාදියි ලසන්තියි එදා අඳුරගන්න බැරි තරමට ලස්සනයි. අපිත් කට ඇරන් ඉන්නවා මේ අපේ සෙට් එකේ අපත එවුන්මද කියලා.

DJ වලදි වෙන ෆැකල්ටි වල කොල්ලොත් එනවනෙ. එදා අපේ කෙල්ලො දෙන්නා පස්සෙ යන යන තැන කොල්ලො දෙන්නෙක් පිස්සු හැදිල වගේ එනවා. උන් එක්ක බලෙන් නටනවා. අපේ අනිත් උන් අරුන් දෙන්නට රවනවා රවනවා අයින් වෙයන් කියලා. කොහෙද මුන් දෙන්නට ගානක් නෑ.

අර කොල්ලො දෙන්න නිෂාදිටයි ලසන්තිටයි පිස්සු හැදිලා. මුන් දෙන්නා ඉඳ ගත්තොත් උන් දෙන්නත් ඉඳගන්නවා. මුන් දෙන්න නැගිටලා යන්න හැදුවොත් උන් දෙන්නත් ඒ පැත්තට යන්න හදනවා.

සජිත් මගෙ ලඟ වාඩි වෙලා කියනවා ඔන්න බලන්නකො අරු දෙන්න පස්සෙන් ඔය කොල්ලො දෙන්න එන්නෙ නැද්ද කියලා බෝඩිම බලාගන්න කියලා.

දැන් ඉතින් DJ එක මැද්දෙන් අපි බෝඩිමට යන්න පිටත් උනා. ඕක ඉවර වෙනකල් හිටියනම් ඊළඟ දවසෙ උදේට තමා යන්න වෙන්නෙ.

අපේ බෝඩිං සෙට් එකේ ආරක්ෂකයා කවදත් සජිත් තමා. නිෂාදියි ලසන්තියිත් අපිත් එක්ක යනවා. අර කිව්වත් වගේ ඒ කොල්ලො දෙන්න අපේ පිටිපස්සෙන් එනවා. සජිත් බැන බැන එනවා කොහෙද මුන්ට නටන්න ගියාම කොල්ලද බල්ලද කියලා සිහියක් තියෙනවයැ. දැන් බලනවකො වෙන කරදර කිය කියා.

කොහොම හරි අපිව බෝඩිමට දාලා සජිත් යද්දි අර කොල්ලො දෙන්නා නිෂාදියෙයි ලසන්තිගෙයි විස්තර අහලා තිබුණා සජිත්ගෙන්. සජිත් මුකුත් කියන්නැතුව ශේප් වෙලා ඇවිත්.

ඊළඟ දවසෙ අරුන් දෙන්න දඟලනවා බයේ.

"අනේ බං කැම්පස් එකේදි උන් ඇවිත් කතා කරයිද."
"අනේ බං උන් මැරයො වගේ.
"අනේ බං බයයි බං".

මාත් කිව්වා දැක්කොත් නොදැක්කා වගේ අහක බලාගෙන යන්න කියලා.

අපි එදා කැම්පස් යනකොට මෙන්න මේ කොල්ලො දෙන්න මග. නිෂාදියි ලසන්තියි බය වෙලා. අපි මගදිම කතා කරගත්තා නොදැක්කා වගේ ගණන් ගන්නැතුව යමු කියලා.

ඔන්න දැන් උන් අපිව අඳුරගත්තා. ටික ටික අපි අතර දුර අඩු වෙනවා. ටික ටික උන්ගෙ මූණෙ වෙන වෙනස්කමත් අපිට පේනවා. හරියට ලයිට් එකක් ටිකෙන් ටික ඩිම් වේගෙන යනවා වගේ.

හරි නම් අපිනෙ බය වෙන්න ඕනෙ. කොල්ලො දෙන්නා ශොක් වෙලා.

උන් ටික වෙලාවක් අපේ උන් දෙන්නා දිහා මාරුවෙන් මාරුවට බලන් හිටියා. එක පාරටම හැරිලා ගියා යන්න.

අපේ උන් දෙන්නා බයේ හිටියා තමා කතා කරන්න. ඒත් මෙහෙම දෙයක් බලාපොරොත්තු උනේ නෑ. උන්ට එක පාරටම මොකද උනේ. අපිට හෙන ප්‍රශ්නෙ.

පස්සෙ තමා කට්ටිය එක එක්කෙනාගෙ අදහස් සමාලෝචනය කරලා බලද්දි වෙන්න ඇත්තෙ මොකද්ද කියලා තේරුණේ.

උන් එදා එක වෙලාවෙ නිෂාදියි ලසන්තියි අඳුර ගත්තෙ මේකප් ලස්සනින්නෙ. ඒත් නිකං ලෙක්චර්ස් යද්දි උන් දෙන්නම සාමාන්‍යයි.

කොල්ලො දෙන්නා ඒක බලාපොරොත්තු උනේ නෑ. කොටින්ම උන් ශොක් වෙන්න තරම් ලොකු වෙනසක් එතන තිබුණා.

පස්සෙ පස්සෙත් ඒ දෙන්නා අපිට කැම්පස් එකේදි හම්බුණා. හික්ස්. දුර තියාම අපේ දෙන්නව දැක්කම මුන් එක්කො මග ඇරලා යනවා. එහෙම නැත්තන් අහක බලාගෙන යනවා.

උන්ටම ලැජ්ජ ඇති එදා අරම පැණි පෙරාගෙන ඇවිත් දැන් මෙහෙම හැසිරෙනකොට.
මොනා උනත් අපිට නම් ඒක හොඳ විහිළුවක් උනා.

ඔන්න මේකප් යථාර්ථය.