අනාගැනීම් වලට විසඳුම්

ගෙදර දොරේ වැඩ වලදි කොයි තරම් නම් අපි අනාගන්න සිද්ධි වෙනවද. ඒ වගේ පොඩි පොඩි අන්ජබජල් වැඩ වලට විසඳුම් වගයක් මට හම්බුණා. මේල් එකකින් මේක ඇවිත් තිබුණෙ. කාට උනත් ප්‍රජෝජනයක් වෙන දෙයක් නිසා මම බ්ලොග් එකේ දාන්න හිතුවෙ.

හිටපු ගමන් නොසන්ඩාල කොල්ලො උන් කකා ඉන්න චුයින්ගම් එක කාගෙ හරි ඇඳුමක අලවන්න පුලුවන්. එහෙම නැත්තන් ඒ නොසන්ඩාල කොල්ලෙක් කාපු චුයින්ගම් එකක් පුටුවක අලවලා ගිහින් ඒක ඔයාලගෙ ඇඳුමෙ ගෑවෙන්න පුලුවන්. චුයින්ගම් රෙදි වලින් අයින් කරගන්න ලේසි නෑ. එහෙම උනාම කරන්න ඕනෙ ඇඳුම අධිශීතකරණයේ පැයක් විතර තියන්න. දැන් චුයින්ගම් එක අයින් කරගන්න.



ගෙදර පැනි රස දෙයක් තිබ්බොත් බේරගන්න අමාරුම කාගෙන්ද. පොඩි ළමයින්ගෙන් නෙමෙයි කූඹින්ගෙන්. කූඹි හැටට හැටේ දුවගෙන එන්නෙ පැණි රසට. මේ වගේ වෙලාවට කරන්න තියෙන්නෙ පිපිඤ්ඤා පොත්තක් කූඹි ගුල ගාවින් තියන එකලු. මොකද කූඹින්ට පිපිඤ්ඤා පෙන්නන්න බැරි නිසා.



දෙහි මිරිකනකොට වැඩි දෙහි ප්‍රමාණයක් ගන්න ඕනෙ නම් දෙහි උණු වතුරේ පැයක් පමණ දාලා තියලා මිරිකන්න ගන්න.


ලූණු කපනකොට අඬන්නෙ නැති කෙනෙක් ඉන්නවද. අපි නම් අඬා වැලපි වැලපි තමා ලූණු කපන්නෙ. කඳුළු එන එක නවත්ත ගන්න චුයින්ගම් හපන්න කියලා තමා කියන්නෙ.

අල ඉක්මනට තම්බා ගන්න ඕනෙ නම් එක අල ගෙඩියක තම්බන්න කලින් පොත්ත ටිකක් අයින් කරගන්න. එතකොට අල ඉක්මනට තැම්බෙනවලු. ඒ වගේම අල බතල වගේ දේවල් තැම්බුවාම සමහර වෙලාවට පොතු ගහන්න අමාරුයි. එතකොට ලිපෙන් බාපු ගමන්ම සීතල වතුරට දැම්මා නම් පොත්ත ලේසියෙන් ගැලවෙනවා.


තමන්ගෙ ඇඳුමට තින්ත පෑනෙ තින්ත හලා නොගත් කෙනෙක් ඉන්නවද. ඉස්කෝලෙ කාලෙ නම් තින්ත පෑන් වලින් ලියන්න ගත්ත අලුත සුදු ඇඳුමේ නිල් මෝස්තර කරගෙනනෙ ගෙදර එන්නෙ. මෙහෙම වැටුණු තින්ත අයින් කරගන්න නම් දත් බෙහෙත් ටිකක් තින්ත පැල්ලම උඩ අතුරලා සම්පූර්ණයෙන් වේලෙන්න තියන්න. ඊට පස්සෙ හෝදලා දාන්න.

එදිනෙදා ජීවිතයට මේ දේවල් ටිකක් හරි වැදගත් වෙයි. ඉතින් යාන්තමට හරි මතකයේ තියාගත්තොත් වැඩක් අනාගත්තු වෙලාවට ප්‍රයෝජනවත් වෙන්න පුලුවන්.

ආයෙ මොකෝ පෙරමු ගෙදරම වයින්

වයින්.. මට නම් ලව් ඇට් ෆස්ට් සයිට් වගේ තමා.

වයින් බිව්වා වගේ නෙමෙයි යන වියදම හුඟක් වැඩියි. ඒත් වයින් ගෙදරම හදාගන්න පුලුවන් නම් ඒ දාස් ගාණක් වියදම් කරන සල්ලි ඉතුරු කරගන්න පුලුවන් නේද.

වයින් රෙසිපි එකක් කාලෙකට කලින් අහු උනා. ඒත් වෙලාවක් හම්බ උනේ නෑ හදල බලන්න. මේ පාර ගෙදර ගියාම තමා ඔන්න ඒකත් හදල බැලුවෙ. මේ තැඹිලි වලින් හදන වයින්. අවශ්‍ය දේවල් බොහොම ටිකයි.

තැඹිලි වතුර බෝතල් එකයි
සීනි 125g
දෙහි ඉස්ම කෝප්ප 1/2
කරාඹු නැටි 4
එනසාල් 4
කුරුඳු පොතු දිග කෑල්ලක්
ඊස්ට් තේ හැඳි එක හමාරක්

මුලින්ම තැඹිලි වතුරට සීනි එකතු කරගන්න.

ඊස්ට් වෙනම තැඹිලි වතුරෙන් දිය කර මෙයට එකතු කරන්න.

අනිත් සියලුම දේ එකතු කර බෝතලයකට දමා සති දෙකක් පමණ වසා තබන්න.

ඊට පසු පිරිසිදු රෙදි කැබැල්ලකින් හෝ වයින් ෆිල්ටර් එකකින් පෙරාගන්න. (අපිට කොහෙද වයින් ෆිල්ටර්. රෙදි කෑල්ලක් තමා ඉතින්.)

අවශ්‍ය නම් ඊට පසු සීනි ග්‍රෑම් 100ක් කර කර පාට වීම සඳහා මෙයට කලවම් කරගන්න.

පෙරා ගැනීමට සති දෙකකට වැඩි කාලයක් තැබුවොත් ඇල්කොහොල් ප්‍රතිශතය වැඩි විය හැක. එසේ වූවාට ප්‍රශ්නයක් නැතිනම් මාසයක් දෙකක් තබාගෙන බීමට ගන්න.
මෙන්න මගේ වයින් එක.

තාම පෙරුවෙ නෑ. ඒකයි අව පාටකින් තියෙන්නෙ. හරි අපූරු සුවඳක් හමනවා.

අම්මගේ දැඩි විරෝධතා රැවුම් ගෙරවුම් මධ්‍යයේ මායි තාත්තයි පුදුම අමාරුවකින් බෝතලේ බේරගෙන ඉන්නෙ.

හැපි හොලිඩේස්........

අලුත් අවුරුද්දත් එනවා නේද ළඟ ළඟම.

මේ පාර නම් ලොකු නිවාඩුවකුත් අරගෙනමයි එන්නෙ.

මම නම් ගමේ යන්නයි ලෑස්තිය.

මේ නිවාඩුව එනකල් ඇඟිලි ගැන ගැන හිටියෙ.

අවුරුද්දට කලින් ආයෙ මට බ්ලොග් එක පැත්තෙ එන්න වෙන්නෙ නෑ.

ඒ නිසා අලුත් අවුරුද්දට කට්ටියට දැන්මම සුභ පතන්නම්කො.

එහෙනම් ලබන්නා වූ අලුත් අවුරුද්ද සුභම සුභ අලුත් අවුරුද්දක් වේවා.

22 එනවනෙ කට්ටිය නේද. එදාට හම්බවෙමු එහෙනම්.

මොණර බිත්තර

අවුරුද්දෙ එක කාලෙකට අපේ පැත්තෙ මොණරු රංචු පිටින් දැකගන්න පුලුවන්. මේ දවස් වල අපේ වත්තටත් මොණරු ඇවිත්. සාමාන්‍යයෙන් මොණරු රංචුවක මොණරු හතරක් පහක් සහ සෙබඩලා දහයක් දොලහක් ඉන්නවා. හිටපු ගමන් උදේට පිල් විදහගෙන ඉන්නව බලාගන්නත් පුලුවන්.

කොච්චර ලස්සන උනත් උන් එළවළු කොටුවට පැන්නොත් නම් මහ විනාසයක් කරන්නෙ. හැදීගෙන එන මිරිස් කරල් තමා උන්ගෙ ප්‍රියතම ආහාරය. මිරිස් විතරක් නෙමෙයි උන්ගෙ හොට තියෙන මානයේ තියෙන්නෙ මොනාද ඕනෙ එළවළුවකට වග කියනවා. ඒ හින්දා මේ දවස් වල අපේ තාත්තගෙ පරම හතුරා වෙලා ඉන්නෙ මොණරා.

වත්තෙ ඇවිදිද්දි අහම්බෙන් මට මෙන්න මේවා දකින්න ලැබුණා.

මොණර බිත්තර වගයක්. මොණරු දැකල තිබ්බත් මම නම් ඔය මොණර බිත්තර දැක්කමයි. සාමාන්‍යයෙන් කිකිළි බිත්තරයක් වගේ දෙතුන් ගුණයක් විතර ඇති. පොළව මට්ටමෙන් ටිකක් ඉහළ ගොඩැල්ලක එළිමහනෙ තමයි සෙබඩෙක් බිත්තර දාලා තිබුණෙ.

මේක දැක්ක වෙලාවෙ හිතුණෙ බිත්තර පිපිරිලා මොණර පැටවු ආවම උන්ගෙ පින්තූරත් අරගෙන බ්ලොග් පෝස්ට් එකක් දාන්න ඕනෙ කියලා. ඒත් අවාසනාව කියන්නෙ ටික දවසකට පස්සෙ බලද්දි මෙන්න මේකයි මට දකින්න තිබුණෙ.



බිත්තර ටික තිබ්බ තැන නෑ. එක බිත්තරයක් විතරක් පල්ලෙහාට වැටිලා බිඳිලා. පහුගිය දවස් වල මේ හරියෙ මුගටි ජෝඩුවක් කැරකුනාලු. ආයෙ සැකයක් නෑ මේ උන්ගෙ වැඩක්. අපරාදෙ. ඒත් ඉතින් විලෝපීයතාවය එහෙමනෙ. කරන්න දෙයක් නෑ.

මුගටියො බිත්තර වලට කිට්ටු කරන කොට සෙබඩ ඉන්න නැතුව ඇති. මුන් සාමාන්‍යයෙන් ඒ වගේ උන්ට පන්න පන්න කොටන්නෙ. ඊට පස්සෙත් මොණර රංචුව එහෙ මෙහෙ ඇවිද ඇවිද හිටියා. බිත්තර නම් ආයෙ දැක්කෙ නෑ.

මුන්ගෙ කොහෙ ෆොටෝ ගන්නද. චුට්ටක් ළං වෙනකොට පණ කඩාගෙන දුවනවා. යංතම් මගෙ පැපරාසි ට්‍රික්ස් දාලා ගහපු ෆොටෝ ටිකක් මේ තියෙන්නෙ.

ඔක්කොමත් හරි මොණරු කෑ ගහන සද්දෙ අහලා තියෙනවද. මෙච්චර ලස්සන සතෙක්ට මේ තරම් කැත සද්දයක් මොකට ලැබුණාද මන්දා.

අපේ උන්ගෙ විභාග ලිවිල්ල

ඊයෙ පෙරේදා ඕ ලෙවල් රිසල්ට්ස් ආවනෙ. අපේ මල්ලි කෙනෙකුත් මේ පාර විභාගෙ ලිව්වා.

මූ ඉගෙන ගත්තු ඉගෙන ගැනිල්ලට අපි නම් මූ ගැන බලාපොරොත්තු අත ඇරලයි හිටියෙ. මේකගෙ ජීවිතේම කැඩෙටින්, ස්කවුටින්, මියුසික්, වීඩියෝ ගේම් සහ රස්තියාදු විතරයි. මූ පොතක් අල්ලනවා දැක්කොත් ඒ පවන් ගහගන්න මිසක් පාඩම් කරන්න නම් නෙමෙයි. ඒ තරම් හෝප්ලස්.

විභාගෙ කිට්ටු උනාමවත් මේකා පොතක් පාඩම් කරවන්න යොමු කරන්නම බැරි තැන මුගෙ තාත්තා හෙවත් අපේ මාමා කිව්වෙ "වැඩිය එපා අඩුම ගානෙ සී හතරයි එස් පහක් ගනින්" කියලා.

මූ මොකද කිව්වෙ දන්නවද.

"සී පහක් ගන්නම් හැබැයි රුපියල් පන්දාහක් දෙන්න ඕනෙ."

එහෙම හරි කමක් නෑ මූ විභාගෙ පාස් වෙනව නම්. මාමා කැමති උනා ඒකට.

කවුරුවත් නොහිතපු විදිහට මූට මේ පාර බී එකයි සී පහයි එස් දෙකයි. කෝමද අල්ලස.

මාමා පොරොන්දු වෙච්ච විදිහටම මූට රුපියක් පන්දාහක් දුන්නා. දෙන ගමන් පොඩි අවවාදයකුත් දුන්නා.

"උඹ ඕ ලෙවල් පාස් උනා වගේ මහන්සි වෙලා වැඩ කරලා ඒ ලෙවලුත් පාස් වෙයන්."

මුගේ උත්තරේ දන්නවද.

"හරි තාත්තෙ ඒ ලෙවලුත් පාස් වෙන්නම්. හැබැයි රුපියක් විසි පන්දාහක් ඕනෙ."

මාමට කලන්තෙ හැදුනලු. ඔන්න අපේ උන්ගෙ තරම. විභාග ලියන්නෙත් අල්ලසටයි දැන්.

ලිට්ල් හෙල්ප් ප්ලීස්..

"මළා..."

මොනිටරේ දිහා මම බලන් හිටියෙ හරිම හිස් හැඟීමෙන්. ඒ හැඟීම හරියට රික්තකයක් වගේ. මුකුත් නෑ. මම ෂොක් වෙලා හිටියෙ. ටිකකින් තමයි මොලේ යථා තත්වෙට පත් වුණේ. ඊටත් පස්සෙ තමා හැඬීම්, වැළපීම්, පසුතැවීම්, සාපකරගැනීම් ඇරඹුණේ.

මට ඕනෙ උනේ පෝටබල් හාඩ් එකේ තිබ්බ ෆිල්ම් වගයක් පෙන් ඩ්‍රයිව් එකට දාගන්න. ඒත් පෙන් එක ගහපු වෙලාවෙ ඉඳන් වයිරස් එකක් පොප් අප් වෙනවා. ඩිලීට් කරද්දිත් ආයෙ ආයෙ එනවා. ඒ නිසයි මම හිතුවෙ පෙන් එක ෆෝමැට් කරන්න ඕනෙ කියලා. ඒ සිතුවිල්ලට මම දැනුත් පසුතැවෙනවා.

පෙන් එකේ අයිකන් එක උඩ රයිට් ක්ලික් කරලා ෆෝමැට් කමාන්ඩ් එක දුන්නා. ෆෝමැට් කරපුවාම හැමදේම නැති වෙලා යන හින්දනෙ දෙයියනේ කම්පියුටරය ආයෙ මගෙන් අහන්නේ ආ යූ ෂුවර්? කියලත්. ඒකත් මම ඕකේ කරේ පුරුද්දට. වෙනදට තත්පරෙන් ෆෝමැට් වෙන පෙන් එක අද තත්පර කීපයක් ගියේ ඇයි කියලා බලනකොටයි මට දෙලෝ රත් උනේ.

හුටා! මම ෆෝමැට් කරලා තියෙන්නෙ පෙන් එක නෙමෙයි හාඩ් එක. අයියෝ මගෙ අවුරුදු ගාණක මහන්සිය. ෆිල්ම් කීයක්ද. ෆිල්ම් නම් ආයෙ හොයාගන්න බැරියැ. ඒත් පරණ ෆෝටෝ!. ඒවා ආයෙ වෙන තැනක ඇත්තෙත් නෑ. මම ෆයිනල් ඉයර් එකේ කට්ට කාගෙන කරපු ප්‍රොජෙක්ට් එක. හැම තැනින්ම එකතු කර ගත්තු සොෆ්ට්වෙයාර් ටික. හයියූ.. සල්ලි.. ඒ එක එක මතක් වෙද්දි තමා රික්තකේකට ඇදිලා ගියා වගේ දැනෙන්නෙ.

මගේ ලැප් ටොප් එකකලින් දවසකත් කිව්වා වගේ බිම වැටිලා පලු දෙකකට ගැලවුණානෙ. ඕක හදන්න දුන්නු නිසා ඒකෙ තිබ්බ ඒවා දාගත්තෙත් හාඩ් එකට. ඒ නිසා මගෙ සන්තකේම තිබ්බෙ හාඩ් එකේ. දැනෙන පසුතැවීම තිව්‍ර වෙද්දි මම හිත හදාගත්තෙ සුනාමි ආවෙත් ප්ලෑන් කරලා නෙමෙයිනෙ කියලා හිතලා. මිනිස්සුන්ට එක මොහොතකින් නැති වෙන දේවල් එක්ක මේවා මොනාද.

පස්සෙ කෙනෙක් කිව්වා රිකවරි සොෆ්ට්වෙයාර් එකක් තියෙනවා කියලා. ඒක ගැන දන්න කෙනෙක් ඉන්නවද? නෙට් එකේ සර්ච් කරත් හරි විස්තරයක් හොයාගන්න බැරි උනා. ප්ලීස් හෙල්ප් මී... ජාති ජාතිත් ආනිසංස ලැබිය හැකි පුණ්‍යකර්මයකට දායක වෙන්න ප්ලීස් හෙල්ප් මී..

වැඩි තක්කාලි විසි නොකර ජෑම් හදමු

මේ දවස් වල හැම තැනම තක්කාලි පලදාව හොඳයි. පහුගිය දවස් වල තක්කාලි මිල අඩු වෙලා කිලෝ ගණන් විනාස කරලත් තිබුණනෙ. අපේ ගෙදර එළවළු කොටුවෙත් බල්බ් දැම්මා වගේ තක්කාලි හැදිලා.

ගෙදර ගියපු දවස් වල හැම වෑංජනේකටම තක්කාලි. පොල් සම්බෝලෙටත් තක්කාලි. තක්කාලි සම්බෝල, තක්කාලි හොදි විතරක් නෙමෙයි තක්කාලි තෙල් දාලත් කන්න ලැබුණා. අම්මපා මට ඒ දවස් ටිකේ තක්කාලි එක්ක තිබ්බ තරහක් නම්..

තක්කාලි වලින් හදන්න පුලුවන් හැම කෑමක්ම හැදුවට පස්සෙ තමයි අපෙ අම්මට මතක් උනේ තක්කාලි ජෑම් හැදුවෙ නෑනෙ කියලා. ඔයාලට උනත් ප්‍රයෝජන වෙන්න පුලුවන් මේ රෙසිපි එක මේ කාලෙ. හදලා බලමුද තක්කාලි ජෑම්.

අවශ්‍ය දේවල් නම් ඉතාම සීමිතයි. හොඳින් ඉදුණු තක්කාලි, සීනි සහ වැනිලා චුට්ටක් විතරයි ඕනෙ වෙන්නෙ.

මුලින්ම හොඳින් ඉදුණු තක්කාලි ගෙඩි ටිකක් අරගෙන (අපි නම් කිලෝ එක හමාරක් විතර ගත්තා) හොඳට සෝදගන්න. දැන් පැහෙන උණු වතුර තක්කාලි මතට වත් කරලා විනාඩි පහලවක් විතර තියන්න. ඊට පස්සෙ තක්කාලි ගෙඩි වල පොත්ත අයින් කරගන්න. යන්තමට තැම්බිලා නිසා පොතු අයින් කරගන්න ලේසියි.

ඊට පස්සෙ තක්කාලි ටික බ්ලෙන්ඩර් කරගන්න. ඕනෙ නම් ඊට පස්සෙ තක්කාලි ඇට ටික අයින් කරගන්නත් පුලුවන්. ඒත් අපි නම් එහෙම්මම තියෙන්න ඇරියා. කන වෙලාවට තක්කාලි ඇට තිබ්බා කියලා වෙනසක් දැනෙන්නෙ නෑ.

ඊට පස්සෙ බ්ලෙන්ඩර් කර ගත්තු තක්කාලි පේස්ට් එක භාජනේකට දාලා සීනි ග්‍රෑම් 500ක් විතර දාලා ලිපේ තියලා රත් කරන්න. මතක තියාගන්න මේ එක වෙලාවකදිවත් වතුර පොඩ්ඩක්වත් දාන්න එපා. එහෙම උනොත් කල් තියාගන්න බැරි වෙයි.

ලිපේ තියෙන මිශ්‍රණය නිතරම හැඳි ගාමින් ඉන්න. විනාඩි දහයකින් පහළොවකින් උකු ගතියට එනකොට වැනිලා බිංදු කීපයක් දාලා ලිපෙන් බාගන්න. දැන් නිවුණට පස්සෙ බෝතල් වල අසුරගන්න.



රස ගැන කියනවා නම් තක්කාලි රසක් නම් එන්නෙ නෑ අමුතුවෙන්. මට නම් සාමාන්‍ය ජෑම් රසම තමා එන්නෙ. තක්කාලි කිලෝ එක හමාරකින් මධ්‍යම ප්‍රමාණයේ ජෑම් බෝතල් තුනක් පුරවගන්න පුලුවන් ප්‍රමාණෙට ජෑම් හදාගන්න පුලුවන්.

මේ දවස් වල සුපුරුදු තක්කාලි සහිත කෑම වලට අමතරව තක්කාලි ජෑම් සමඟ පාන්, තක්කාලි ජෑම් සමඟ රොටී, තක්කාලි ජෑම් සමඟ ක්‍රීම් ක්‍රැකර් විතරක් නෙමෙයි තක්කාලි ජෑම් සමඟ බටර් කේකුත් කැවෙනවා. දැන් ඉතින් තක්කාලි වාරෙ ඉවර වෙනකල් තක්කාලි වලින් නම් ගැලවීමක් නෑ.